आठ महिनामा सात हजार ८० युनिट इभि गाडी आयात, ४६ प्रतिशतले बढ्यो राजस्व

काठमाडौं : पछिल्लो समय विद्युतीय गाडीको आयात उल्लेख्य रुपमा बढेको छ ।  चालु आर्थिक वर्षको आठ महिनामा मात्रै सात हजार बढी इभि गाडी आयात भएका छन् । 

भन्सार विभागकाे तथ्यांकअनुसार फागुन मसान्तसम्म सात हजार ८० युनिट विद्युतीय कार, जीप र भ्यान आयात भएको हो । यस अवधिमा सरकारले १६ अर्ब ६४ करोड ३२ लाख ८७ हजार रुपैयाँ बराबरको उक्त संख्यामा गाडी आयात गरेको हो ।

उक्त संख्या गत वर्षको सोही अवधिको तुलनामा १०.०२ प्रतिशतले बढी हो । गत वर्षको सोही अवधिमा नेपालले १५ अर्ब ८१ करोड ९७ लाख रुपैयाँ बराबरको ६ हजार ४३५ युनिट विद्युतीय गाडी आयात गरेको थियो । 

विद्युतीय गाडीको आयातसँगै राजस्व संकलनमा पनि सुधार देखिएको छ । गत वर्षको सोही अवधिमा इभि गाडीको आयातबाट ६ अर्ब ९९ करोड २६ लाख रुपैयाँ राजस्व संकलन भएको थियो भने यस वर्ष आयातित गाडीबाट १० अर्ब २२ करोड ११ लाख रुपैयाँ राजस्व संकलन भएको छ । जुन ४६.१७ प्रतिशतले बढी हो । 

नेपालमा विश्वप्रसिद्ध ब्रान्डका ५० किलोवाटदेखि ३०० किलोवाटका  विद्युतीय गाडी आयात हुने गरेका छन् । यस अवधिमा सबैभन्दा धेरै ५१ देखि १०० किलोवाटका गाडी आयात भएका छन् । यस सेग्मेन्टमा नौ अर्ब ६९ करोड २२ लाख मूल्यका तीन हजार ८७९ गाडी भित्रिएका छन् ।

सबैभन्दा धेरै विद्युतीय गाडी छिमेकी मुलुक चिनबाट आउने गरेको छ भने भारत, कोरिया, जर्मन, इन्डोनेसिया, अमेरिका लगायतका मुलुकहरूबाट पनि नेपालमा विद्युतीय सवारी आयात हुने गरेको छ ।

फागुन मसान्तसम्म नेपालले ५० किलोवाटसम्मका चार अर्ब ५५ करोड ४३ लाख मूल्य बराबरका दुई हजार ५३१ युनिट गाडी आयात गरेको छ । त्यस्तै १०१ देखि २०० किलोवाटका ६५४ युनिट, २०१ देखि ३०० किलोवाटसम्मका १४ ओटा गाडी भित्रिएका छन् भने ३०० किलोवाटमाथिका बिजुली गाडी २ युनिट आयात भएका छन् ।