अमेरिका-इरान तनावमा कूटनीतिक मोडः वार्तामा प्रगति, ट्रम्पले सैन्य आक्रमण स्थगित गरे

वाशिङ्टन : अमेरिका र इरानबीच जारी संवेदनशील वार्तामा उल्लेखनीय प्रगति भएको अमेरिकी उपराष्ट्रपति जेडी भान्सले बताएका छन् । उनले दुवै पक्ष तत्काल सैन्य टकरावभन्दा कूटनीतिक समाधानतर्फ उन्मुख देखिएको संकेत दिएका हुन् ।

सञ्चारकर्मीहरूसँगको कुराकानीमा भान्सले राष्ट्रपति डोनाल्ड ट्रम्पको निर्देशनअनुसार अमेरिका परिणाममुखी ढंगले वार्तामा संलग्न रहेको बताए । उनले वार्ता सकारात्मक दिशातर्फ अघि बढे पनि आवश्यक परे वैकल्पिक रणनीति तयार रहेको चेतावनी दिएका छन् ।

भान्सले अमेरिकाको मुख्य चासो इरानलाई आणविक हतियार विकास गर्नबाट रोक्नु रहेको स्पष्ट पारे । ‘इरानले कुनै पनि परिस्थितिमा परमाणु हतियार प्राप्त गर्न सक्दैन,’ उनले भने ।

यसैबीच, रुसले इरानको संवर्धित युरेनियम आफ्नो नियन्त्रणमा लिन सक्ने भन्ने अन्तर्राष्ट्रिय सञ्चारमाध्यममा आएका प्रतिवेदनहरूलाई भान्सले खण्डन गरेका छन् । उनका अनुसार यस्तो प्रस्ताव अमेरिकी प्रशासनको औपचारिक योजनाभित्र छैन, साथै इरानले पनि त्यसमा विशेष रुचि देखाएको छैन ।

यसअघि राष्ट्रपति ट्रम्पले पाकिस्तानको मध्यस्थतामा भइरहेको वार्ताबाट सकारात्मक संकेत प्राप्त भएको बताएका थिए । खाडी क्षेत्रका सहयोगी राष्ट्रहरूसँगको समन्वयपछि ट्रम्पले वार्तालाई निष्कर्षमा पुर्‍याउन थप दुईदेखि तीन दिनको समय दिएका छन् ।

कूटनीतिक प्रयास तीव्र भइरहेका बेला ट्रम्प प्रशासनले इरानविरुद्धको सम्भावित सैन्य कारबाही तत्कालका लागि रोकेको छ । राष्ट्रपति ट्रम्पले मंगलबार प्रस्तावित आक्रमण योजना स्थगित गर्न पेन्टागनलाई निर्देशन दिएको अमेरिकी स्रोतहरूले जनाएका छन् ।

अमेरिका–इरान सम्बन्ध फेरि एकपटक तनाव र संवादको दोबाटोमा पुगेका बेला पछिल्ला घटनाक्रमलाई मध्यपूर्वको सुरक्षा र विश्व राजनीतिका लागि महत्वपूर्ण रूपमा हेरिएको छ ।